Home>BIRD Magazine>QUAL L’AMPORTÁNÇA DE LA LHÉNGUA MIRANDESA PARA PERTUAL?
BIRD Magazine

QUAL L’AMPORTÁNÇA DE LA LHÉNGUA MIRANDESA PARA PERTUAL?

CARLOS FERREIRA 
Ua democracie madura i spessa cumo la nuossa, tamien ten que ser democracie lhenguística, promobendo i praticando assi un de ls sous percípios mais fundamentales: l respeito pula diferença. Para cuncretizar esse percípio, las leis son amportantes, mas solo cun eilhas, nun s’atíngen ls perpósitos q’ancérran! Por esso, tambiem nun chega ua lei que proclame l mirandés cumo lhéngua oufecial, eisige-se de l Stado, a níble ouropeu, nacional i lhocal, que cuncretize ls cumpromissos q’assumiu na lei, ne ls sous mais bariados domínios.
Por to l mundo, specialmente n’Ouropa, fai cada beç mais sentido la defénsia de las chamadas lhénguas minoritairas, tornando-se esta lhuita nua eibidéncia para un númaro de pessonas cada beç más amportante, sobretodo porque stan mais anformadas i alertadas pa l’amportança de la diversidade an giral. Tamien al ser criada an 1997 pula UNESCO la figura de Patrimónho Cultural Eimaterial de l’Houmanidade, las pessonas i las anstituiçones ampeçórun a balorizar muito mais l amparatibo que se tornou de preserbar essa parte de l patrimónho de l’houmanidade. Dende que la defénsia i promoçon de la lhéngua mirandesa deba ser bisto cumo ua eisegéncia de cidadanie de la mais alta amportánça, i que nun ten solo ua dimenson lhocal, mas tamien nacional i anternacional.
La dibersidade lhenguística i cultural ye ua riqueza para Pertual, q’antegra de pleno dreito la nuossa eidentidade anquanto naçon, por esso debe ser aceite la berdade stórica i sociológica, durante muito tiempo negada i refutada, apersentando-se Pertual cumo paíç bilhingue, antegrando essa referénça ne ls porgramas de las nuossas scuolas, dando a coincer a to ls cidadanos l’eisiténça de la lhéngua mirandesa, la sue ourige i las sues caratelísticas.
Muito par’alhá de la dinidade de ls sous falantes, ye atrabeç dua lhéngua que se sprime la cultura, las tradiçones, ls saberes, i to ls modos de bida que fúrun fundamentales pa l anquelíbrio dua determinada sociadade. I apuis l mirandés pouco pan come, i se la lhéngua mirandesa zaparecir naide ganha nada cun esso, pul cuntrairo, Pertual, ls pertueses i de maneira mais cercana ls mirandeses, todos quedaran muito mais probes, bisto que pa la region de Miranda, la lhéngua i la cultura mirandesa, assúmen-se cumo amportante recurso eiconómico, que ten un grande balor eiquenómico i financeiro associado, q’inda mais amporta tener an cuonta, ne l cuntesto dua region depremida eiquenomicamente i an acelarado processo de zprobamiento.
Por faláren outra lhéngua, ls mirandeses nun son menos pertueses que ls outros, i al lhargo de mais d’uitocientos anhos de stória yá mostrórun que nun quieren ser outra cousa a nun ser Pertueses. Por esso ye mui buono i amportante que ls mirandeses cuntínen a tener dues lhénguas, percebendo que afirmando i çfendendo l mirandés nun stan an nada a negar que son pertueses por anteiro: çfender, promober i zambulber la lhéngua mirandesa ye un deber de cidadanie que s’ampon a to ls pertueses, percipalmente i an purmeiro lhugar, a to ls mirandeses.

Deixe uma resposta

O seu endereço de email não será publicado. Campos obrigatórios marcados com *

Este site utiliza o Akismet para reduzir spam. Fica a saber como são processados os dados dos comentários.