Home>BIRD Magazine>L’ALMA DE LS LHUGARES OU UA CIERTA GIOGRAFIE DE LS SONIDOS
BIRD Magazine

L’ALMA DE LS LHUGARES OU UA CIERTA GIOGRAFIE DE LS SONIDOS

CARLOS FERREIRA
Quantas Tierras ten la Tierra? Fuosse you xordo i nun falarie assi!
Na sociadade global percisamos que cada tierra seia çfrente, outéntica, que tenga alma, porque doutra maneira ls turistas nunca alhá pónen ls pies! Porque doutra maneira las pessonas que alhá bíben nun ténen eidentidade!
Ls turistas i biajantes que s’astrében a pisagar i correr la Tierra de Miranda: abístan l Praino, mas muitos prainos hai pul mundo; abáixan sues lhadeiras i arribas fantástiscas, mas muitas lhadeiras i arribas hai pul mundo; I riu que scabou aquel trabalho, anque tamien alhi s’alimente, nien alhi nace, nien alhi zauga, stá solo de passaige, i muitos outros rius de passaige hai pul mundo.
Míran las nubres guapas a passar, quaije a topar-le, porque stan mais acerquita de ls uolhos, porque l Praino stá a 700m d’altura i an to ls prainos, mais ou menos altos, ye assi: las nubres stan mais acerca; l aire ben i cuorre para loinge, cumo to ls aires, an to ls lhados de l mundo. L sol nace, assoma-se, rechina, i nun quier saber de la Tierra de Miranda para nada, tal cumo an to l sistema solar, l sol nun quier saber de nada nien de naide: ls sous remilhones de splusones nucleares bástan-le para ser! Las bistas i miradas al loinge i al acerca, las arbles, la giente, las casas, todo l que quéda ne ls retratos: todo esso hai por outras Tierras de l mundo, sien que se beia assi tanto de rialmente nuobo ou resbelgado! Mas se ls biajantes i turistas apeduráren l oubido, puoden oubir sonidos que nunca oubiran noutro lhado de l ouniberso, sonidos dessa giografie sonora que talbeç l biajante nien antenda, mas bóndan esses sonidos lhebes cumo prumas, para que l biajante puoda dezir: esta tierra ye çfrente, sonidos cumo estes nun oubimos noutro lhado! Als xordos que sonidos nun ouben, antra-le puls uolhos ua lhuç q’amostra ua outra maneira amparelhar las letras de ls chameiros toponímicos: ç, ie, uo, lh, on, an…

Ye fundamiento scruitar l absoluto de las coisas mínimas: sien eidentidade, sien alma, se quedarie la Tierra de Miranda, calhando-se ls sonidos de sue lhéngua mirandesa!

Deixe uma resposta

O seu endereço de email não será publicado.

Este site utiliza o Akismet para reduzir spam. Fica a saber como são processados os dados dos comentários.