“He esta çidade de Miranda povoação antigua deste Reyno situada no ultimo fim delle”, screbiu Severim de Faria, xantre de l cabido de la Sé de Ébora, ne l relato de ua biaige que fizo a Miranda de l Douro, a ampeços de l seclo XVIII, an 1709, para saludar l bispo de Miranda (nunca ye de mais lhembrar que, naquel tiempo, la dioceze de Miranda, cun cabeça na cidade que l’amprestaba l nome, abarcaba mais de metade de Trás ls Montes), saludar anton l bispo de Miranda q’habie acabado de ser nomeado bispo d’Ébora.
Último fin, arreparai bien, “ne l último fin del”; nun era ne l fin de l reino, era ne l último fin del.
Pus ye, mius amigos, la santença de Severim de Faria, mais de trezientos anhos apuis, cuntina tan berdadeira cumo naquel tiempo: Miranda ye cidade antiga de l reino i cuntina ne l ÚLTIMO fin del. A fazer fé ne l senhor doutor Google Maps, Miranda ye hoije la capital de cunceilho mais çtante de Lisboua (i bou-me a poupar eiqui a lhembrar las maleitas de la “macrocefalie” que la República Pertuesa hardou de l Reino de Pertual) mais cousa menos cousa, uns quinhientos quilómetros i picos, mais meia dúzia delihes que la bezina bila de l Bumioso.
Ora isto, nun parecendo, nun ye bien la mesma cousa star ne l fin ou star ne l último fin, mormente quando amentamos, cumo tal, an “interior” ou porblemas de la “interioridade”.
Para falar solo de l que you conheço, cumo tal, Ponte de Lima (ua tierra formidable adonde tube la suorte i l gusto de bibir un anho) diç que tamien ye “interior”, ye la gente d’alhá que l diç (oubi-lo an muita cumbersa) i son tamien ls normatibos de l goberno pertués que l cunfírman cumo território de l “interior”, nesses planos de balorizaçon de l “interior” que naide soubo nunca muito bien para que serbíssen.
I será “interior” Ponte de Lima, será, quien sabe alhá, son oupeniones…
Agora, l que nun ye oupenion, ye facto cierto, cierto, ye que, an Ponte de Lima (mas podie cun certeza amentar noutros lhugares), an Ponte de Lima, eilhi delantre de la bila, a la borda de l riu – a que muitos cháman Lethes – ándan siempre uns páixaros grandotes a piar i a sbolaciar. Quando se le pregunta a algun Limiano (ls que se quéixan de ls males de bibir ne l “interior”), quando se le pregunta, anton, que culidade de páixaro ye aquielha dízen-bos que son… gueibotas.
Gueibotas, nun ye anganho miu.
Ora, heis de cuncordar que hai alguas çfréncias antre las gueibotas de Ponte de Lima – i de toda essa culidade de “interior” – i las águilas i ls alcaforros que bólan nas arribas de l Douro Anternacional. L quemido ye çfrente, las maleitas son çfrentes, ye muita cousa çfrente, de maneira que l trato tamien habie de ser çfrente. Querer meter todo na mesma gueiola ye capaç de nun ser cousa de cabeças mui finas i cumoquiera nun trai bantaiges para niua de las culidades de ls páixaros.
Buono, i adonde quieres chegar tu cun esta cumbersa de paixarada, procurais bós.
Pus stou cierto que nun chegarei mui loinge, yá mais de trezientos anhos que stou ne l fin, perdon, ne l ÚLTIMO fin de l reino, yá colhimos cinismo que bonde para nun star a spera nien tener grandes sprácias na besitas de xantres de niua culidade.
Mas, de qualquiera maneira, nun era mal que ls “ournitólogos” que trátan de la “paixarada de l reino” cabiláran un cachico i pesáran bien las rezones antes de treminar ls cielos que ls nuossos páixaros han de bolar.
