Alfredo Cameirão
Anda un belouro grande puls jornales i pulas talbizones, “á mai, á mai” que ban a fazer un trabiado – un palco – an Lisboua para recebir Sue Santidade l Papa Fracisco i l aparato bai a custar cinco melhones – 5 000 000.00€ – de ouros.
You antendo que nun hai rezones para tanta sinagoga. Se por un lado si ye berdade que puode parecer muito denheiro – arreparai bien, cinco melhones d’ouros daba para ampuntar de l trabalho aqueilha Alxandra Reis uas 10 bezes (a meio melhon de cada beç, claro) – por outro lhado, i fazendo outras cuontas, cumo tal, tenien que se fazer uns quarenta trabiados – 40 palcos – de l Papa para chegar al bunton de denheiro que la EDP arrebanhou de la décima – si, ampuostos – que deixou de pagar nas trafulhices que fazírun cula benda de las barraiges de l Douro anternacional. Claro, nun sei se dais fé?, las notícias dezírun que la EDP deixou de pagar 200 melhones – ponemos tamien an númaros para que se beia bien: 200 000 000.00€ – de décima i inda naide l zmintiu.
Staba eiqui a cabilar culs mius betones: la Tierra de Miranda – Miranda de l Douro, Mogadouro i Bumioso – adonde l denheiro de la décima essa habie de ser ambriado, ten uas 40 fraguesies (44 para ser mais cierto, 21 Mogadouro, 13 Miranda i 10 Bumioso), de maneira que l dinheiro que la EDP mos quedou – mos stá – a deber a todos daba para fazer un trabiado an cada fraguesie de la Tierra de Miranda – cumo tal, para ls arraiales de berano – i inda sobrában uas crouas para botar foguetes.
Mas you torno a dezir, acho bien que l Persidente de la Cámara de Lisboua (l home a gastar denheiro assi a la tripa-forra habie de se chamar Carlos Notas an beç de se chamar Carlos Monedas ) l home gaste l denheiro que seia perciso para deixar las cousas apilaradas. Arreparai bien: l tal trabiado diç que há de tener la grandura de meio campo de la bola por bias de, antre muitos outros, tenéren de caber alhá arrimado a mil bispos. Si, 1000 bispos! Outra cousa que you tamien acho bien, yá que son las Jornadas Mundiales de la Jubentude ye bien que seian ls bispos a star mais cerca de l Santo Padre, todos sabemos que ls bispos son moços nuobos, poucos passarán de ls 30 i de maneira que ye bien que Lisboua amostre Fracisco al mundo arrodiado de mocidade.
I ye que apuis, nun se bos squeça, l trabiado esse diç que se bai a poder rioutelizar, l que ye siempre cousa buona, un trabiado de la gradura de meio campo de futebol, palha nun palha, stá siempre a fazer falta.
You aperpongo yá ua riutelizaçon: arrecantar par’alhá ls miles de porsores que ban a andar a alberotar Lisboua astanho, mais mil, menos mil, bien amanhados ye capaç de caber alhá un tagalho deilhes i nun stróban al tránzito de la cidade culas passeatas que ténen la manha de fazer. Mais a mais, se l trabiado stá al serbiço de las Jornadas de la Jubentude, de la mocidade, dá mesmo citre para bispos i para porsores, que todo mundo sabe que ándan mais ou menos pula mesma eidade.
Inda que isto de porsores, hai que l dezir, mal merécen que se gaste ua croua que seia cun eilhes, siempre mal ancarados i als óulios a la puorta de las scolas i pulas rues de la capital, nunca hai “trabiados” que se fágan i eilhes quéden cuntentos, por mi bien le bundában ls strados para screbir ne l quadro.
Ora deixai-me fazer ua acumparança (que ye la maneira de dezir “metáfora” an mirandés): quéixan-se ls porsores que solo ténen 6 mas para fazer bien l sou trabalho percisában de 10.
Pus muito bien, l Senhor Menistro, cun toda la buona fé i buona buntade, para ls ber calhados i a temar cunta de ls garotos cumo le pertence i para ber las rues de Lisboua zampedidas, dixo que l gobierno nun ten cundiçones de chegar als 10 (isto ou hai para trabiados ou para porsores, yá ye un abanço, la última beç, nun sei se dais fé?, cumbancírun-mos que ou era para porsores ou para fazer l IP3, las cousas ténen que ser sérias, cumo dezie Vale e Azevedo) mas l gobierno bai anton a aponer-se i l Senhor Menistro yá pormetiu que, inda que cun sacrafícios, stá purparado para cuntentar ls porsores l dar-le l drobo de 3.
L DROBO, arreparai bien! Pus nien assi stan quetos, assi nun hai quien puoda gobernar.
Por falar an gobernar: acabórun agora mesmo de dezir ne l rádio que afinal la Secretaira de Stado que era para ser mas nun fui (mandada ampuntar, nun sei se dais fé?, por Sue Eicelença l Senhor Persidente de la República, que nun le gusta meter-se nien falar de assuntos que nun le respéiten, por isso ye que nun fala de ls porblemas de ls porsores, diç el, deixai-me a mi parar eiqui un cachico para abrir la boca de spanto), la Secretaira de Stado, anton, diç que afinal yá nun fai falta i tanto dá que steia cumo nó, nun bai a haber Secretaira nuoba.
Ora, nunca outra tan acertada cumo esta. Se cada 15 dies zarriscáren un meco, digo, un membro de l gobierno, nun par de meses stamos capazes de yá nun sobrar niun i calhando nun le damos pula falta.
Al fin i al restro, stou cumo diç la mie bezina eiqui na Miranda: Muito haberá que ber ne l outro mundo… se nun faltar la letecidade. I you acrecento: la letecidade ne l outro mundo nun falta, nó, bonda que la EDP de l lhado d’alhá mande tanto i tenga las felpas desta d’acá, bien puode benir San Pedro armado an Menistro de las Finanças que nun ye capaç de le topar cun un dedo molhado. Nien de le fazer pagar la décima, s’acauso houbir barraiges alhá.
